Дар шаҳри Ҳисор аз зеристгоҳи 110-киловолтаи «Хонақоҳ» то маркази шаҳраки Ҳисор хати нави 10-киловолтаи барқ васл карда шуд. Дар ин бора ба АМИТ «Ховар» дар мақомоти иҷроияи ҳокимияти давлатии шаҳри Ҳисор иттилоъ доданд.

Зеристгоҳи «Хонақоҳ» дар доираи таҷлили 3000-солагии Ҳисор бо ҳидояти Пешвои миллат муҳтарам Эмомалӣ Раҳмон соли 2014 мавриди истифода қарор гирифта буд.

Зеристгоҳи амалкунандаи барқи «Ҳисор» соли 1968 бунёд гардида, барои пайваст намудани 40 адад трансформатори барқӣ дар 4 чашмак пешбинӣ шуда бошад ҳам, имрӯз ба он 95 адад трансформатор насб гардидааст, ки бо сарбории зиёд дар фасли тирамоҳу зимистон боиси садамаҳои зиёд ва тез-тез хомӯш гардидани неруи барқ дар шаҳрак мегардид.

Бо назардошти ҳамин мушкилӣ Раиси шаҳри Ҳисор Қосим Роҳбар 23 июни соли равон бо соҳибкорону сохтмончиёни муваффақи шаҳр мулоқот карда, роҳи ҳалли мушкилотро дар кашидани хати нави барқ ба маркази шаҳрак арзёбӣ намуд. Ҳамзамон даъват ба амал овард, ки бо дастгирии соҳибкорону сохтмончиён метавон то дараҷае сатҳи дастрасӣ ба барқи хушсифатро беҳтар ва талафоти онро коҳиш дод. Пешниҳод аз ҷониби иштирокчиёни мулоқот, ҳамчунин роҳбарияти шабакаҳои барқи марказӣ дастгирӣ ёфта, бо харҷи 495 ҳазор сомонӣ ба масофаи 4,5 километр хати нави барқи 10-киловолта кашида шуд.


Сардори идораи шабакаҳои барқ дар шаҳри Ҳисор Мансур Файзуллоев иштирокдорони маросими васли хати нави 10- киловолтаи барқро аз зеристгоҳи 110- киловолтаи «Хонақоҳ» тариқи нақшаи умумии шабакаҳои барқи шаҳраки Ҳисор бо лоиҳа ва амалӣ гардидани ин тарҳ шинос намуд. Зикр шуд, ки аҳолии шаҳраки Ҳисор беш аз 31 ҳазор нафар буда, афзоиши табиии аҳолӣ 2,7 фоизро ташкил медиҳад.

Ҳоло дар шаҳр бахшида ба 35-солагии истиқлолият бунёди 1625 иншооти таъйиноташон гуногун ба нақша гирифта шудааст, ки 675 адади он ба шаҳраки Ҳисор рост меояд. Инчунин тибқи нақшаи генералии шаҳр, бунёди даҳҳо адад биноҳои баландошёнаи истиқоматӣ бо ҷойгир намудани марказҳои савдою хизматрасонӣ дар назар дошта шудааст, ки насбу васли боз 30 адад трансформатори тавоноиашон 400 кВт-ро тақозо мекунад.

Марҳилаи якуми корҳо дар ин самт ба анҷом расида, пас аз анҷоми марҳилаи дуюму сеюм, ки аллакай оғоз гардидаанд, биноҳои маъмурии давлатӣ, беморхонаи марказӣ, маркази саломатии шаҳрӣ ва дигар иншооти муҳим ба хатҳои нав васл гардида, сарбории трансформаторҳое, ки аҳолӣ ҳоло истифода мебарад, кам мегардад.

Ин иқдом ҳамзамон сифати дастрасии аҳолиро ба барқ дар маркази шаҳрак то андозае беҳтар менамояд.