Дастаи мунтахаби Тоҷикистон оид ба футбол, ки барандаи Мусобиқаи 48-уми байналмилалии «King’s Cup 2022» дар Таиланд гардид, субҳи имрӯз ба Душанбе баргашт. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Дар Фурудгоҳи байналмилалии Душанбе ҳайати дастаи мунтахаби Тоҷикистонро роҳбарияти Федератсияи футболи Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, намояндагони воситаҳои ахбори омма ва мухлисон самимона истиқбол гирифтанд.

Дастаи мунтахаби Тоҷикистон дар мусобиқаи «King’s Cup 2022» ду бозӣ анҷом дод. Шогирдони Петр Сегрт дар бозии даври нимниҳоӣ бар дастаи Тринидад ва Тобаго (2:1) ва дар бозии ниҳоӣ аз рӯи силсилаи пеналтӣ бар дастаи мунтахаби миллии Малайзия (3:0) пирӯз шуданд.