25 март дар шаҳри Берлин бо ибтикори Сафорати Ҷумҳурии Тоҷикистон дар Ҷумҳурии Федеративии Олмон ду барномаи фарҳангӣ бахшида ба ҷашни байналмилалии Наврӯз бо шукӯҳу шаҳомати хос ва дар фазои мутантан гузаронида шуд. Дар ин бора АМИТ «Ховар» бо истинод ба Сафорати Тоҷикистон дар Олмон хабар медиҳад.

Дар барномаи ҷашнӣ ҳамватанони муқими Олмон, доираҳои илму фарҳанг, намояндагони кишварҳои ҳавзаи Наврӯз, кормандони воситаҳои ахбори омма, меҳмонони фахрӣ ва дӯстони Тоҷикистон ширкат доштанд.

Сафири Тоҷикистон дар Олмон Имомудин Сатторов изҳор дошт, ки Наврӯз таҷассуми чеҳраи инсонӣ, хираду фазилат, одобу маърифат, илму адабу дониш ва ҳама хуҷастагиҳои дигари халқи тоҷик мебошад.

Барномаи рангини консертӣ бо иштироки ҳунарманди мардумии Ҷумҳурии Тоҷикистон Давлатманд Хол дар хотири меҳмонон таассуроти дилнишин боқӣ гузошт.

Баъд аз анҷоми қисмати фарҳангӣ барои меҳмонон дастархони наврӯзӣ бо анвои гуногуни хӯрокҳои миллии тоҷикӣ ороста шуд.