19 октябр ҳайати Ҷумҳурии Тоҷикистон таҳти роҳбарии муовини Вазири корҳои хориҷӣ Шараф Шерализода дар Конфронси Вена оид ба муҳоҷират дар мавзӯи «Бознигарии сиёсати муҳоҷират: чолишҳо, имконот ва стратегияҳо» ширкат варзид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Конфронси мазкур ба масъалаҳои марбут ба вазъи кунунии муҳоҷират дар минтақаҳои гуногуни дунё, аз ҷумла таъсири таҳаввулоти сиёсӣ ва амниятӣ дар Афғонистон дар ин раванд бахшида шуда буд.

Дар ҳамоиш Ш. Шерализода ба ҳайси гузоришгари калидӣ дар мавзӯи авлавияти кунунӣ ва ояндаи ҷомеаи ҷаҳонӣ ҷиҳати беҳбудӣ бахшидан ба вазъият дар Афғонистон мавқеи Тоҷикистонро ироа кард. Дар интиҳои нишаст ӯ ба саволҳои ҳозирин роҷеъ ба мавзӯъ посух дод.