Ба ифтихори Рӯзи ҷавонони Тоҷикистон, ки 23 май таҷлил мегардад, дар Майдони 800-солагии Москва бо ибтикори мақомоти иҷроияи ҳокимияти давлатии шаҳри Душанбе дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон барномаи фарҳангии шоми ҷавонӣ таҳти унвони «Ҷовидон бод ҷавонӣ ва ҷавонон» доир гардид.

Дар он роҳбарияту кормандони вазорату идораҳо, кумитаҳо, сохторҳои дахлдори шаҳриву ҷумҳуриявӣ, гирандагони стипендияҳои Президентӣ ва Раиси шаҳри Душанбе, ҷавонони фаъоли касбу кори гуногуни пойтахт ва дигар минтақаҳои кишвар иштирок намуданд.

Муовини Раиси шаҳри Душанбе Мавсума Муинӣ иштирочиёни шоми ҷавонӣ ва тамоми ҷавонони пойтахтро аз номи Раиси шаҳри Душанбе муҳтарам Рустами Эмомалӣ ба муносибати Рӯзи ҷавонони Тоҷикистон муборакбод намуда, дар робита ба таваҷҷуҳи Раиси шаҳри Душанбе нисбат ба дастгирии ҷавонон ва фароҳам овардани шароиту имконияти арзанда ба ин қишри ояндасози ҷомеа дар пайравӣ ба сиёсати ҷавонпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ибрози назар намуд.

Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода оид ба иштироки фаъолонаи ҷавонон дар ҳаёти ҷамъиятиву сиёсӣ, фарҳангиву варзишӣ ва раванди созандагиву бунёдкории мамлакат сухан кард.

Сиёсати давлатии ҷавонон дар шаҳри Душанбе дар радифи дигар соҳаҳо бо таваҷҷуҳ ва ғамхории доимии Президенти Ҷумҳурии Тоҷикистон муҳтарам Эмомалӣ Раҳмон ва дастгириҳои пайвастаи Раиси шаҳри Душанбе муҳтарам Рустами Эмомалӣ чун яке аз самтҳои афзалиятноки сиёсати иҷтимоӣ дар шаҳри Душанбе пазируфта шудааст.

Дар пойтахт марҳила ба марҳила бо қабул гардидани барномаҳои соҳавӣ, фароҳам овардани шароиту имконияти худтакмилдиҳӣ, иштирок дар ҳаёти иҷтимоиву сиёсӣ, саҳмгузорӣ дар корҳои ободониву созандагӣ, ватандӯстӣ, таҳкими ҳувияти миллӣ, ҳифзи дастовардҳои соҳибистиқлолии мамлакат, ваҳдату ягонагӣ, фарҳанг ва асолати миллӣ шароити мусоид фароҳам оварда шудааст.

Саҳми ҷавонону наврасон дар татбиқи сиёсати давлатии кишвар назаррас буда, онҳо дар таҷлил ва баргузории барномаҳои фарҳангӣ-фароғатӣ дар доираи эълон гардидани «Душанбе-пойтахти фарҳангии Иттиҳод-2021» ва 30-солагии Истиқлоли давлатии Ҷумҳурии Тоҷикистон нақши назаррас доранд.

Бо мақсади татбиқи босамари сиёсати давлатии ҷавонон, мусоидат ба раванди тарбияи ватанпарастӣ ва дар сатҳи баланди фарҳангӣ ва эҷодиву маърифатӣ таҷлил намудани Рӯзи ҷавонони Тоҷикистон нақшаи чорабиниҳои мақомоти иҷроияи ҳокимияти давлатии шаҳри Душанбе оид ба таҷлил намудани Рӯзи ҷавонони Тоҷикистон ташкил шуда, дар шаҳри Душанбе якчанд барномаҳо гузаронида шуданд.

Баргузории Фестивали дӯстии ҷавонони шаҳри Душанбе таҳти унвони «Ҷавонон дар масири истиқлол ва давлатдории миллӣ», Форуми шаҳрӣ вобаста ба пешгирӣ аз гаравидани наврасону ҷавонон ба терроризму экстремизм таҳти унвони «Муқовимат ба ифротгароӣ- омили рушди босуботи ҷомеа», Форуми шаҳрии варзишгарони пойтахт таҳти унвони «Варзиш омили муҳими солимиву зебоӣ ва таҳкими дӯстию бародарист!», ҳамоишҳои гирандагони стипендияи Раиси шаҳр ва Президентӣ аз ҳамин қабиланд.