Бо ташаббуси мақомоти иҷроияи ҳокимияти давлатии шаҳри Турсунзода дар ҷамоатҳои деҳоти ба номи Ҷӯра Раҳмонов ва Турсун Тӯйчиев корҳои таъмиру тармими роҳу ҷӯйборҳо ва чароғонкуниву сабзазоркунӣ вусъати тоза гирифтаанд. Ба ин иқдоми созанда ҷавонмардони саховатманд ва сокинони бонангу ори Ҷамоати деҳоти Регар низ пайравӣ намуда, тавассути ҳашарҳои дастаҷамъона корҳои созандагиро вобаста ба рушди маҳал вусъат медиҳанд.

Котиби матбуоти раиси шаҳри Турсунзода Фирӯз Холиқов изҳор дошт, ки имрӯзҳо аз ҳавои мусоиди фасли зимистон истифода намуда, деҳаи Шаҳрисабзи шаҳр ба майдони корҳои созандагӣ табдил ёфтааст. Саховатмандону сокинон бо эҳсоси баланди ватандорӣ барои ободонии маҳал камари ҳиммат баста, ба таъмиру тармими роҳу ҷӯйборҳо машғуланд.

Ҳамзамон дар ин деҳа корҳои беҳдошти муҳити зист ва чароғонкуниву хуррамгардонӣ муташаккилона идома доранд.