Роҳбари гурӯҳи кории 30-солагии Истиқлолияти давлатии Ҷумҳурии Тоҷикистон дар ноҳияи Спитамен, Раиси Суди Олии иқтисодии Ҷумҳурии Тоҷикистон Мавлуда Қаландарзода тарбиятгирандагони интернати наздимактабии ноҳияи Спитаменро аёдат намуда, ба 22 нафар хонандагон либосҳои зимистона, маводи безараргардонӣ, ба монанди антисептик, ниқобҳои муҳофизатӣ, дастпӯшакҳо, китобҳои бадеӣ ва асарҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро тақдим намуд. Дар ин бора аз Суди Олии иқтисодии Ҷумҳурии Тоҷикистон ба АМИТ «Ховар» иттилоъ доданд.

Ҳамчунин дар рӯзҳои ҷашни Истиқлолияти давлатӣ роҳбарияти Суди Олии иқтисодии мамлакат барои аёдат ба Муассисаи давлатии «Хонаи кӯдакони №1»-и Раёсати тандурустии шаҳри Душанбе рафта, ба тарбиятгирандагон кумаки молӣ намуд.

Мавлуда Қаландарзода таъкид намуд, ки тамоми тарбиятгарони мактаб-интернатҳои мамлакат дар меҳвари таваҷҷуҳи Пешвои муаззами миллат қарор дошта, барои таъмини зиндагии шоистаи онҳо тадбирҳои зарурӣ андешида мешаванд.