29 март 2024, ҷумъа

Тоҷикӣ   Русский   English Специальная версия

Дар Хоруғ бинои Маркази ҳамкории милитсия бо ҷомеа мавриди баҳрабардорӣ қарор мегирад

316
Дар кӯчаи ба номи Сабралӣ Бадалиеви маҳаллаи Тирчиди шаҳри Хоруғи Вилояти Мухтори Кӯҳистони Бадахшон сохтмони бинои Маркази ҳамкории милитсия бо ҷомеаи шаҳрвандӣ дар арафаи анҷомёбӣ қарор дорад. Қарор аст, ки марказ моҳи апрели соли равон ба фаъолият оғоз намояд. Дар ин марказ баргузории мулоқоту суҳбатҳои нозирони минтақавӣ бо аъзои Шӯрои ҷамъиятӣ ва сокинони маҳалла бо мақсади пешгирӣ ва ошкорсозии қонунвайронкунӣ дар назар аст. Дар утоқҳои корӣ барои фаъолияти пурсамар тамоми шароит муҳайё карда мешаванд.

Маркази ҳамкории милитсия дар сари роҳ ҷойгир буда, ҳар сокини ин маҳалла метавонад барои ҳалли масъалаи ҳуқуқии худ ба он муроҷиат кунад.

Яке аз утоқҳои корӣ дар ин бино барои аъзои Шӯрои ҷамъиятӣ оид ба мусоидати ҷомеаи шаҳрвандӣ дар таъмини тартиботи ҷамъиятӣ ҷудо шудааст. Ҳамаи утоқҳои корӣ бо таҷҳизоти муосири технологӣ муҷаҳҳаз гардонида шудаанд, то ҷамоатҳо тавонанд дар ҳамкорӣ бо милитсия масъалаҳои ҳуқуқии худро баррасӣ намоянд.

Ҳамоҳангсози барномаи «Ҳамкории милитсия бо ҷомеа» дар Вилояти Мухтори Кӯҳистони Бадахшон Некрӯз Наврӯзов баён дошт, ки ин лоиҳа аз тарафи Вазорати корҳои дохилии Ҷумҳурии Тоҷикистон тасдиқ шуда, дар амалӣ намудани он созмони байналмилалии “Дунёи бехатар” ва Идораи назорати маводи мухаддир ва ҳифзи тартиботи ҳуқуқии Сафорати Амрико дар Тоҷикистон саҳм мегузоранд. Дар Вилояти Мухтори Кӯҳистони Бадахшон Ташкилоти ҷамъиятии “Ассотсиатсияи ҳуқуқшиносони Помир” дар татбиқи ин лоиҳа нақши муассир дорад.

Яке аз вазифаҳои муҳими ин марказ ба вуҷуд овардани боварию эътимод байни милитсия ва ҷомеа мебошад. Акнун аъзои Шӯрои ҷамъиятӣ дар ҳамкорӣ бо нозирони минтақавӣ имконият пайдо мекунанд, ки оид ба масъалаҳои ҳуқуқӣ, таҳдиду хатарҳои замони муосир, аз ҷумла, тундгароӣ, суиистифода аз маводи мухаддир, зӯроварӣ дар ҷомеаю оила ва баробарҳуқуқии ҷинсӣ семинару конфронс баргузор намоянд.

Узви Шӯрои ҷамъиятӣ Хурсанд Мамадшоев гуфт, ки “яке аз ҳадафҳои шӯро-ин ба ҷомеа шарҳу тавзеҳ додани ҳуқуқу уҳдадориҳои шаҳравандон аст. Ҳар як шаҳрванд бояд аз ҳуқуқу уҳдадориҳои хеш огоҳ бошад, зеро надонистани қонун шаҳрвандро аз ҷазо озод намекунад. Ба ҳамин хотир байни милитсия ва ҷомеа бояд ҳамкории судманд ва иртиботи қавӣ ба роҳ гузошта шавад, то мардум дар фазои озод ва бехатар зиндагӣ кунанд”.

Бо мақсади ба вуҷуд овардани эътимоду боварӣ байни милитсия ва ҷомеа аз ҷониби Шӯрои ҷамъиятӣ дар шаҳри Хоруғ семинар ва ҳар гуна мусобиқаҳои варзишӣ баргузор мегарданд. Чанде пеш бо ширкати кормандони шуъбаи Вазорати корҳои дохилӣ дар шаҳри Хоруғ ва намояндагони ҷомеаи шаҳрвандӣ мусобиқаҳо доир ба шоҳмот ва тенниси рӯимизӣ баргузор ва ба ғолибони мусобиқа ҷоизаю туҳфаҳои хотиравӣ тақдим шуданд. Масъулин ба наврасону ҷавонони 15 маҳаллаи шаҳр лавозимоти варзишӣ ҳадя намуданд.

Моҳи апрели соли равон ифтитоҳи чунин маркази дорои утоқҳои барҳаво ва муҷаҳҳаз бо таҷҳизоти муосири коммуникатсионӣ дар деҳаи Баррӯшони ноҳияи Рӯшон низ дар назар аст.

АМИТ «Ховар»




Назарсанҷи

Ба фаъолияти Раёсати экспертизаи давлатии ғайриидоравии ҳуҷҷатҳои лоиҳавии шаҳрсозӣ ва Корхонаи воҳиди давлатии «Ташхисгар» чӣ гуна баҳогузорӣ мекунед?

 

Суроға:

734025, ш. Душанбе, кўчаи проф. Ш. Ҳусейнзода 36,

Тел: +992 (37) 221-88-53
+992 (37) 221-88-33

Факс: +992 (37) 223-02-00,

Е-mail: info@tajsohtmon.tj

Обу ҳаво