29 март 2024, ҷумъа

Тоҷикӣ   Русский   English Специальная версия

Раиси шаҳри Душанбе ба масъулин барои омодагии саривақтӣ ба мавсими тирамоҳу зимистони имсола супоришҳои мушаххас дод

664
Нақшаи чорабиниҳои Мақомоти иҷроияи ҳокимияти давлатии шаҳри Душанбе оид ба сари вақт омода намудани соҳаҳои иқтисодиёту иҷтимоиёти пойтахт барои фаъолияти мунтазам ва самарабахш дар давраи тирамоҳу зимистони солҳои 2019 – 2020 тасдиқ гардид. Дар ин бора қарори Раиси шаҳри Душанбе Рустами Эмомалӣ ба имзо расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, тибқи қарори мазкур Ситоди шаҳрӣ таъсис дода шуда, масъулини Мақомоти иҷроияи ҳокимияти давлатии шаҳри Душанбе, роҳбарони корхонаю муассисаҳо ва ташкилотҳои пойтахт, новобаста аз тобеияти идоравӣ ва шакли моликият вазифадор гардидаанд, ки доир ба сари вақт омода намудани фаъолияти мунтазами корхонаю ташкилотҳо дар мавсими тирамоҳу зимистон чорабиниҳои мушаххас таҳия ва амалӣ намоянд.

Ҳамчунин тибқи қарори дахлдор, бо мақсади баланд бардоштани сатҳи хизматрасонӣ ба аҳолии шаҳр дар мавсими тирамоҳу зимистон ва ҳалли масъалаҳои бамиёномада дар ноҳияҳо, корхонаю муассисаҳо ва ташкилотҳои шаҳри Душанбе таҳти сарварии раисони ноҳияҳо ва роҳбарони аввали сохторҳо ситодҳои дахлдор таъсис дода мешаванд.

Дар робита ба ин, Муассисаи давлатии «Шабакаи гармидиҳандаи шаҳри Душанбе» муваззаф гардидааст, ки чорабиниҳои санҷишиву омодасозии бинову иншооти таъйиноти гуногунро (манзилҳои истиқоматӣ, муассисаҳои маорифу тандурустӣ ва дигар корхонаю ташкилот) дар муҳлатҳои муайянгардида бо пешниҳоди шиносномаи тайёрӣ ба анҷом расонида, ҳамчунин мутобиқи талаботи қонунгузории амалкунанда бо истифодабарандагони энергияи гармӣ шартномаҳои дахлдори хизматрасонӣ ба имзо расонад.

Муассисаи мазкур ҳамчунин вазифадор гардидааст, ки дар якҷоягӣ бо раисони ноҳияҳои шаҳри Душанбе ва мақомоти худфаъолияти ҷамъиятӣ, сохторҳои идоракунии биноҳои бисёрхонагӣ, соҳибмулкони манзили биноҳои бисёрхонагӣ баҳри омода намудани системаҳои гармитаъминкунии дохилибиногии истифодаи умум тадбирҳои мушаххас андешанд.

Дар асоси ин қарор ба Корхонаи воҳиди давлатии «Обу корези Душанбе» супориш дода шудааст, ки бо мақсади омодасозии иншооту воситаҳои технологии истеҳсолу интиқоли оби нӯшокӣ, қабулу тозакунии оби ғализ ва таъмини фаъолияти мунтазаму самараноки онҳо дар мавсими тирамоҳу зимистони солҳои 2019 – 2020 ҷиҳати ба миқдори меъёрӣ захира намудани маводи безараргардонӣ ва обсофкунӣ дар истгоҳҳои обтаъминкунии шаҳрӣ тадбирҳои зарурӣ андешад.

Ба Корхонаҳои коммуналии воҳиди давлатии «Автобус — 1», «Автобус — 2», «Автобус — 3», «Троллейбус» ва Муассисаи давлатии коммуналии «Душанбенақлиётхадамотрасон» супориш дода шудааст, ки нақшаи чорабиниҳои омодагиро барои гузаронидани мавсими тирамоҳу зимистон то 1 июни соли 2019 таҳия ва тасдиқ намоянд.

Муассисаи давлатии «Равшании Душанбешаҳр» вазифадор гардидааст, ки тибқи нақша захираи маводи зарурӣ (ноқилҳои барқӣ, чароғҳои равшанидиҳанда ва васлкунанда) гузаронидани корҳои омодасозии шабакаҳои равшанидиҳӣ ва дастгоҳу таҷҳизоти технологиро амалӣ намуда, таъмини равшанидиҳии шаҳр ва фаъолияти нуқтаҳои тақсимотиро дар мавсими тирамоҳу зимистон бо инобати сарфаҷӯии энергияи барқ ба роҳ монад.

Тибқи супориши Раиси шаҳр ҷаласаҳои сайёри ситоди шаҳрӣ дар ноҳияҳои шаҳри Душанбе ва сохторҳои дахлдор бо иштироки бевоситаи роҳбарони мақомоти худфаъолияти ҷамъиятӣ ва сохторҳои идоракунии биноҳои бисёрхонагӣ, роҳбарони сохторҳои шаҳриву ноҳиявии марбута гузаронида мешаванд ва сардори ситод дар ҳолатҳои зарурӣ роҳбарони корхонаю идораҳо, муассисаҳо ва намояндагони дахлдори мақомоти иҷроияи марказии ҳокимияти давлатиро барои баррасии масъалаҳои корӣ ба ҷаласаҳо даъват менамояд.

Масъулин вазифадор гардидаанд, ки аз ҷараёни иҷрои нақшаи чорабиниҳо то 5-уми ҳар моҳ ба унвони Раиси шаҳри Душанбе маълумоти муфассал пешниҳод намоянд.




Назарсанҷи

Ба фаъолияти Хадамоти назорати сохтмон чӣ гуна баҳо мегузоред?

 

Суроға:

734025, ш. Душанбе, кўчаи проф. Ш. Ҳусейнзода 36,

Тел: +992 (37) 221-88-53
+992 (37) 221-88-33

Факс: +992 (37) 223-02-00,

Е-mail: info@tajsohtmon.tj

Обу ҳаво