Бахшида ба 35-солагии Истиқлоли давлатии Ҷумҳурии Тоҷикистон дар ноҳияи Балҷувони вилояти Хатлон 277 иншооти гуногун сохта, ба истифода дода мешаванд.

Тавре ба хабарнигори минтақавии АМИТ «Ховар» Сулаймон Холзода дар мақомоти иҷроияи ҳокимияти давлатии ноҳия иттилоъ доданд, дар маркази ноҳия охирин корҳои сохтмонӣ ва сабзазоркунии амфитеатр ва боғи истироҳатӣ идома дошта, аз рӯи нақша имсол ба истифода дода мешаванд.

Инчунин сохтмони бинои Мактаби президентӣ барои хонандагони болаёқат идома дорад. Муассиса барои 1200 хонанда пешбинӣ гардидааст. Фармоишгари иншоот Директсияи сохтмони иншооти Ҳукуматии назди Президенти Ҷумҳурии Тоҷикистон ва пудратчӣ Ҷамъияти дорои масъулияти маҳдуди «Сафо-як» мебошад. Ширкат барои сохтмончиён шароити мусоиди кор муҳайё намуда, музди меҳнати коргарон сари вақт пардохт карда мешавад.

Иттилоъ дода шуд, ки бо сабаби нарасидани синфхонаҳо ва ба талабот ҷавобгӯ набудани бинои Муассисаи таҳсилоти миёнаи умумии №10 корҳои сохтмонӣ дар бинои нав бо суръат идома доранд.

АКС: АМИТ «Ховар»