Вобаста ба омодагӣ ба ҷашни 35–солагии Истиқлоли давлатии Ҷумҳурии Тоҷикистон, Раиси Кумитаи меъморӣ ва сохтмони назди Ҳукумати Ҷумҳурии Тоҷикистон бо амри Президенти Ҷумҳурии Тоҷикистон аз 6 майи соли 2022, №АП-188 ба ноҳияи Абдураҳмони Ҷомӣ вобаста шудаанд.
Ҷиҳати иҷрои дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар маҷлиси Ҳукумати Ҷумҳурии Тоҷикистон рӯзи 31 майи соли 2023 баён доштанд ва барқияи ҳукуматӣ аз 2 июни соли ҷорӣ, №24/10-20 Раиси Кумита Мирзозода Низом Юсуфӣ якҷо бо гурӯҳи корӣ иборат аз роҳбарони ташкилотҳои системаи Кумита ва раиси ноҳияи Абдураҳмони Ҷомӣ Раҳимзода Сафармаҳмад аз ҷараёни корҳои ободониву созандагӣ дар ноҳияи Абдураҳмони Ҷомӣ шинос гардиданд.Сафари корӣ аз даромадгоҳи ноҳия оғоз гардида, барои ободонии ҳудуди дарвозаи ноҳия, бартараф намудани биноҳои сарироҳӣ, ободонии купруки даромадгоҳи ноҳия, бунёди лавҳаи “Қаҳрамонҳои Тоҷикистон”, рангубори биноҳои истиқоматии шаҳрвандон ба масъулин дастуру супоришҳои мушаххас дода шуд.
Бояд қайд намуд, ки барои сайругашт ва истироҳати сокинони ноҳия азнавсозии Боғи фарҳангию фароғатии ноҳия идома дорад. Раиси Кумита ҷиҳати тезонидани сохтмони дарвозаи даромадгоҳи боғ бо санъати меъмории миллӣ, суръат бахшидан ба бунёди муҷассамаи мутафаккири шарқ Абдураҳмони Ҷомӣ, ҷойи бозии кӯдакон ва истироҳати калонсолон, суҳбатҷойҳо, амфитеатр барои гузаронидани чорабиниҳо ба роҳбарияти ноҳия ва масъулин маслиҳатҳо доданд.
Зимни шиносоӣ аз рафти корҳои сохтмонӣ ва ободонӣ дар иншоотҳои сохташудаистодаи Дирексияи сохтмони иншооти ҳукуматӣ ва дигар иншоотҳое, ки аз тарафи соҳибкорон бунёд шуда истодаанд, Раиси Кумита барои бо сатҳу сифати баланд дар муҳлатҳои муқарраргардида ба истифода супоридани онҳо фармоишгар ва пудратчиёнро вазифадор намуданд.
Баъдан аз рафти корҳои саҳроӣ, истифодаи замин, парвариши картошка, сабзавот, мевагӣ, пахта ва дигар маҳсулоти полезӣ дар хоҷагии деҳқонии «Дубеда»-и ҷамоати деҳоти Иттифоқ дидан намуданд.
Дар навбати худ гурӯҳи кории Кумита аз 8 ҷамоатҳои деҳоти ноҳия дидан намуда, ҳангоми вохӯрӣ бо аҳолӣ оид ба вусъатбахшии раванди корҳо дар хоҷагиҳои кишоварзӣ, таъмини амнияти озуқаворӣ, захираи кофии маводи хӯрока,
пешгирии баландравии нарху наво дар бозорҳо, истифодаи оқилонаи замини мавҷудаи корам, қитъаҳои замини наздиҳавлигӣ, заминҳои Президентӣ, хоҷагиҳои ёрирасон ва истифодаи заминҳои бекорхобида ва ҳимоявӣ дастуру тавсияҳо дода шуд.
Ҷиҳати расонидани дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар маҷлиси Ҳукумати Ҷумҳурии Тоҷикистон рӯзи 31 майи соли ҷорӣ баён доштанд, Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Мирзозода Низом Юсуфӣ бо фаъолони ноҳия вохӯрии корӣ анҷом доданд.Дар ҷаласа масъалаҳои баланд бардоштани самаранокии фаъолияти корӣ, ҷалби бештари фаъолон дар ҳалли масоили аҳамияти маҳаллидошта, ислоҳи камбудиҳои ҷойдоштаи соҳавӣ, вусъатбахшии раванди корҳо дар хоҷагиҳои кишоварзӣ, истифодаи дурусти замин, таъмини амнияти озуқаворӣ, захираи дусолаи маводи хӯрока, вусъати кишту кори такрорӣ, пешгирии баландравии нарху наво дар бозорҳо, ба тартиб даровардани кӯчаи асосии шаҳрак, рангубори намои биноҳои кӯчаи протоколӣ, ба роҳ мондани тадбирҳои ободонию кабудизоркунӣ, сафарбар намудани аҳолӣ ба корҳои ободониву созандагӣ, риояи қонунҳои Ҷумҳурии Тоҷикистон дар бораи масъулияти падару модар дар таълиму тарбияи фарзанд, танзими анъана ва ҷашну маросимҳо, пешгирии ҷинояткорӣ ва шомилшавии ҷавонон ба ҳизбу ҳаракатҳои ифротӣ мавриди
баррасӣ қарор дода шуда, муовинони раис, сохторҳои дахлдори мақомоти иҷроияи ҳокимияти давлатии ноҳия, раисони ҷамоатҳои шаҳраку деҳот вазифадор карда шуданд.
Дар соҳаҳои кишоварзӣ, обтаъминкунӣ, фарҳанг, маориф, тандурустӣ, роҳдорӣ, дигар иншооти инфрасохторӣ ва паҳлуҳои хоҷагии халқи ноҳия мушкилотҳо муайян карда шуда, дар асоси таҳлилу пешниҳодҳои гуруҳи корӣ як қатор масъалаҳои аввалиндараҷаи ҳалталаб ба нақша гирифта шудаанд.
Аз натиҷаи сафари гурӯҳи корӣ нақшаи чорабиниҳо тартиб дода шуда, иҷроиши он дар муҳлатҳои муқаррагардида таъмин карда мешавад.