Имрӯз дар Маҷлиси намояндагони Маҷлиси Олии Ҷумҳурии Тоҷикистон бо иштироки вакилон, намояндагони Вазорати маориф ва илми Ҷумҳурии Тоҷикистон, Вазорати фарҳанг, Агентии назорат дар соҳаи маориф ва илм, Кумитаи кор бо занон ва оила ва Кумитаи рушди сайёҳии ҷумҳурӣ оид ба заминаҳои ҳуқуқии Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» ҳамоиш баргузор гардид. Дар ин хусус АМИТ «Ховар» бо истинод ба котиби матбуоти Маҷлиси намояндагон хабар медиҳад.

Иброз карда шуд, ки бо қабул гардидани қонуни мазкур ташаккули дарки баланди ватандӯстӣ дар тафаккури шаҳрвандон, ҳисси садоқат ба Ватан, омода будан ба адои қарзи шаҳрвандию уҳдадориҳои конститутсионӣ баҳри ҳимояи манфиатҳои Ватани маҳбуб дар қалби ҳамватанон боз ҳам баланд бардошта мешавад. Ин қонун мардуми ҷумҳуриро ба дӯст доштани марзу бум, Ватан ва давлат даъват менамояд.

Тавре ки Президенти Ҷумҳурии Тоҷикистон муҳтарам Эмомалӣ Раҳмон даъват менамоянд, «мо бояд аз таърихи гузашта сабақ бигирем ва барои ваҳдати комили миллӣ корҳои бузургеро ба анҷом бирасонем».

Ҳамчунин дар назди ҳозирин роҳбарияти Кумитаи ҷавонон ва варзиш ва Вазорати маориф ва илм аз рӯи масъалаҳои рӯзнома сухан гуфтанд.