Аъзои гурӯҳи кории Мақомоти иҷроияи ҳокимияти давлатии шаҳри Норак бо мақсади тарғибу ташвиқи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» бо кормандони ҶСК «Шабакаҳои тақсимоти барқ» ва Муассисаи давлатии «Обҳои нӯшокӣ ва корезӣ» вохӯрӣ намуданд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Норак хабар доданд.

Дар баробари тарғиби нуктаҳои асосии Паёми Президенти Тоҷикистон аъзои гурӯҳи корӣ ҳамзамон сокинонро барои дар рӯҳияи худогоҳӣ, шуҷоатмандӣ ва ватандӯстӣ тарбия намудани ҷавонону наврасон, омода намудани онҳо барои адо намудани хизмати ҳарбӣ ва риояи қонунҳои Ҷумҳурии Тоҷикистон «Дар бораи танзими анъана ва ҷашну маросим» ва «Дар бораи масъулияти падару модар дар таълиму тарбияи фарзанд» даъват намуданд.

Зимни вохӯрӣ дар самти рушди соҳаи энергетика гурӯҳи корӣ таваҷҷуҳи иштирокчиёнро ба масъалаи истифодаи самараноки қувваи барқ, баланд бардоштани маданияти истифодаи неруи барқ ва кам кардани талафоти он ҷалб намуд.