Тавре қаблан хабар додем, ба истиқболи 30-солагии Иҷлосияи ХVI Шӯрои Олии Ҷумҳурии Тоҷикистон дар назди Қасри таърихии Арбоб, ки макони баргузории ин иҷлосияи тақдирсоз аст, Боғи фарҳангию фароғатӣ бунёд гардида истодааст. Дар ҳудуди боғ аз ҷониби ҳашарчиён дарахтони магнолия, буттаҳои ороишию ҳамешасабз ва 10 ҳазор бех гулҳои мавсимии ороишӣ шинонида шуданд.

Дар ин бора АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

26 октябр бо иштироки Раиси вилояти Суғд Раҷаббой Аҳмадзода дар боғи бунёдшаванда ниҳолҳои ороишию ҳамешасабз шинонида шуданд. Раиси вилоят ҷараёни корҳои сохтмониро дар ин мавзеъ мавриди таваҷҷуҳ қарор дод.

Қаблан низ дар ҳудуди боғи мазкур дарахтони ороишию ҳамешасабз шинонида шуда буданд ва ҳоло теъдоди ниҳолҳо ба 1000 бех расид.



Мавриди зикр аст, ки тантанаҳои идона ба муносибати 30-солагии Иҷлосияи ХVI Шӯрои Олии Ҷумҳурии Тоҷикистон дар Қасри Арбоб доир шуда, ба ин муносибат корҳои ободонию созандагӣ ва таъмиру тармими иншооти фарҳангию таърихӣ идома доранд.