Дар деҳаи Ҳасанободи ноҳияи Рӯдакӣ бунгоҳи тиббии замонавӣ мавриди баҳрабардорӣ қарор дода шуд. Ин муассисаи тиббӣ аз 7 ҳуҷра, аз қабили утоқи қабул, хатна, эмгузаронӣ, тибби оилавӣ ва ғайра иборат буда, бо таҷҳизот ва лавозимоти зарурӣ ҷиҳозонида шудааст. Дар ин бора ба АМИТ «Ховар» дар маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.

Дар маросими ба истифода додани ин бунгоҳи тиббӣ намояндагони мақомоти иҷроияи ҳокимияти давлатии ноҳияи Рӯдакӣ ва доираи васеи кормандони соҳаи тандурустии ноҳияи мазкур иштирок намуданд. Дар рӯзи кушодашавии бунгоҳи тиббии мазкур ба 20 нафар кӯдакон амалиёти хатнаи ройгон гузаронида шуд.





Ёдовар мешавем, ки соли равон дар ҳудуди ноҳияи Рӯдакӣ 8 муассисаи тандурустӣ сохта ба истифода дода шуда, инчунин 5 бинои дигар аз таъмири асосӣ бароварда шудааст. То охири сол дар ноҳия 3 муассисаи тандурустӣ низ сохта ба истифода дода хоҳад шуд.