Майдони Исмоили Сомонии шаҳри Хоруғи Вилояти Мухтори Кӯҳистони Бадахшон ва бинои Мақомоти иҷроияи ҳокимияти давлатии шаҳр бо тарҳи замонавӣ навсозӣ мегарданд, хабар медиҳад АМИТ «Ховар» бо истинод ба мақомоти мазкур.

Бо мақсади аз наздик шинос гардидан бо вазъи корхонаҳои саноатии шаҳри Хоруғ ва вусъат бахшидан ба корҳои созандагиву бунёдкорӣ гурӯҳи кории Вазорати саноат ва технологияи нави Ҷумҳурии Тоҷикистон таҳти роҳбарии муовини якуми Вазири саноат ва технологияи нави Ҷумҳурии Тоҷикистон Бахтиёр Шарифӣ ба шаҳри Хоруғ сафар намуд.

Гурӯҳи корӣ бо ҳамроҳии Раиси Вилояти Мухтори Кӯҳистони Бадахшон Алишер Мирзонабот аз майдони Исмоили Сомонии шаҳри Хоруғ дидан кард.

Муовини якуми Вазири саноат ва технологияи нави Ҷумҳурии Тоҷикистон Бахтиёр Шарифӣ бо лоиҳаи навсозии майдони мазкур шинос гардида, барои ба талаботи стандартӣ ҷавобгӯ намудани майдони марказии шаҳри Хоруғ пешниҳодҳои мушаххасро баррасӣ намуд.