Ҳукумати Ҷумҳурии Тоҷикистон қарор мекунад:
Каримзода Абдураҳмон Раҳим муовини раиси Кумитаи меъморӣ ва сохтмони назди Ҳукумати Ҷумҳурии Тоҷикистон таъин карда шавад.

Раиси Ҳукумати Ҷумҳурии Тоҷикистон Эмомалӣ Раҳмон

Каримзода Абдураҳмон Раҳим

10 декабри соли 1968 дар н. Нуробод таваллуд шудааст. Миллаташ тоҷик. Маълумоташ олӣ. Соли 1993 Донишгоҳи техникии Тоҷикистон ба номи академик М.С.Осимиро бо ихтисоси муҳандис-сохтмончӣ хатм кардааст.
Солҳои 1993-1996 дар шуъбаи назорати сифати раёсати «Роғунгесстрой»-и Ширкати давлатии «Нурафзо» муҳандис шуда кор кардааст. Солҳои 1997-1998 ба ҳайси сардори шуъбаи сохтмон ва меъмории Ҳукумати ноҳияи Дарбанд кор кардааст. Аз соли 1998 то 2000-ум ҳамчун муҳандис оид ба баҳодиҳӣ ва омода намудани ҳуҷҷатҳои лоиҳавии раёсати татбиқи лоиҳаҳои хурди «Фидокор», Маркази ҳамоҳангсозии лоиҳаҳои барқарорсозии баъди низоъ дар водии Қаротегин ва Тавилдара, ки аз ҷониби Бонки Ҷаҳонӣ маблғгузорӣ мегардид, фаъолият намудааст.

Аз соли 2000-ум то соли 2002 ба ҳайси Намояндаи бахши кредитҳои хурд оид ба рушди иқтисодии Фонди Оғохон дар ноҳияи Нуробод кор кардааст. Солҳои 2002-2006 ҳамчун сармутахассиси шуъбаи лоиҳаҳои ҷамоавӣ, менеҷери бахши дар шаҳри Душанбе будаи Бунёди Миллии Иҷтимоии Маблағгузории Тоҷикистон кор кардааст.

Аз соли 2006 то соли 2010 дар вазифаи сармутахассиси шуъбаи сохтмони Дастгоҳи Раиси шаҳри Душанбе, Мақомоти иҷроияи маҳаллии ҳокимияти давлатӣ дар шаҳри Душанбе фаъолият намудааст. Солҳои 2011-2015 вазифаи сардори шуъбаи истеҳсолӣ - техникӣ, сардори шуъбаи қарордод ва харҷномаҳо дар Муассисаи давлатии «Мудирияти минтақаи зериобшавандаи НБО Роғун»-ро бар уҳда дошт.

Аз соли моҳи октябри 2015 то феврали соли 2021 ҳамчун Директори Корхонаи воҳиди давлатии «Маркази нархгузорӣ дар соҳаи сохтмон» -и Кумитаи меъморӣ ва сохтмони назди Ҳукумати Ҷумҳурии Тоҷикистон фаъолият намудааст.

Бо Қарори Ҳукумати Ҷумҳурии Тоҷикистон аз 1 феврали соли 2021 ба вазифаи муовини раиси Кумитаи меъморӣ ва сохтмони назди Ҳукумати Ҷумҳурии Тоҷикистон таъин гардид.