Аз панҷоҳ лоиҳа Шӯрои шаҳрсозӣ сетоашро интихоб намуд, ки ояндаи наздик дар пойтахт бунёд мешаванд.

Сарраёсати меъморӣ ва шаҳрсозии Душанбе аз озмуни “Тарабхонаи шаҳр ва қаҳвахона бо пешайвон” натиҷагирӣ намуд.

- Мувофиқи шартҳи озмун, ғолибон имкон доштанд, ки лоиҳаи худро дар пойтахти Тоҷикистон амалӣ созанд, - омадааст дар саҳифаи Сарраёсати мазкур дар Facebook.

Ба озмун беш аз 50 лоиҳа пешниҳод шуда, Шӯрои шаҳрсозии назди Сарраёсати меъмории Душанбе 3 ғолибро интихоб кард.

Зинаи аввалро лоиҳаи тарабхонаи бразилиягии "Latino" ишғол намуд, ки аз ҷониби фирмаи Cool design таҳия шудааст. Лоиҳа тарзу усули модерн ва бионикаро дар бар гирифта, барои 150 нафар ҷойи нишаст пешбинӣ шудааст.



Лоиҳаи тарабхонаи туркии "OZYURT", ки аз ҷониби КВД “Лоиҳакаш” таҳия шудааст, мақоми дуюмро касб кардааст. Лоиҳа бо тарзу услуби муосир таҳия шуда, барои қабули 120 нафар пешбинӣ мегардад.



Ҷойи сеюм ба лоиҳаи тарабхонаи миллӣ барои чорабиниҳои тантанавӣ дода шудааст, ки аз ҷониби КВД Пажуҳишгоҳи истеҳсолии “Душанбешаҳрсоз” таҳия гардидааст. Тарзу услуби нигориши лоиҳа аз унсурҳои миллӣ ва шарқӣ иборат буда, 160 ҷойи нишаст дорад.



Лоиҳаҳои ғолибони озмун минбаъд бар асоси қарори раиси пойтахт дар шаҳри Душанбе амалӣ мешаванд. Ҳамчунин ғолибон бо дипломҳои Шӯрои шаҳрсозии пойтахт қадрдонӣ мешаванд.