Хадамоти иҷозатномадиҳии фаъолияти шаҳрсозӣ

Хадамоти иҷозатномадиҳии фаъолияти шаҳрсозӣ
Файзуллозода Нусратулло Қудратулло,
Сардори Хадамоти иҷозатномадиҳии
фаъолияти шаҳрсозӣ

Хадамоти иҷозатномадиҳии фаъолияти шаҳрсозӣ мақомоти ҳокимияти иҷроия буда, иҷозатномадиҳиро дар соҳаи сохтмони Ҷумҳурии Тоҷикистон анҷом медиҳад.

Хадамот зерсохтори Кумитаи меъморӣ ва сохтмони назди Ҳукумати ҶТ буда, фаъолияташро мутобиқи Низомномаи худ, ки бо Қарори Ҳукумати ҶТ аз 3 апрели соли 2007, №171 тасдиқ гардидааст, ба роҳ мондааст. Инчунин Хадамот дигар санадҳои меъёрии ҳуқуқии марбути соҳаи сохтмон ва меъмориро ба роҳбарӣ гирифта, фаъолияти худро дар ҳамкорӣ бо дигар мақомоти марказии ҳокимияти иҷроия, мақомоти иҷроияи маҳалии ҳокимияти давлатӣ, ташкилотҳои ҷамъиятӣ ва дигар ташкилотҳо анҷом медиҳад. Хадамот дар ҳар семоҳа ба Кумита оид ба натиҷаи фаъолияти худ ҳисобот пешниҳод менамояд.

Вазифаи асосии Хадамот ин – додани иҷозатнома ба шахсони воқеӣ ва ҳуқуқӣ оид ба фаъолияти сохтмонӣ ва меъморӣ дар ҳудуди ҶТ мебошад.

Сохтори дастгоҳи марказии Хадамот иборат аст аз: роҳбарият; шӯъбаи молия; шӯъбаи кадрҳо ва ҳуқуқ; шӯъбаи қабули ҳуҷҷатҳо; шӯъбаи омӯзиш ва назорат; шӯъбаи сертификатдиҳӣ.

Хадамотро Сардор роҳбарӣ менамояд, ки бо пешниҳоди Раиси Кумитаи меъморӣ ва сохтмони назди Ҳукумати Ҷумҳурии Тоҷикистон аз ҷониби Ҳукумати ҶТ ба вазифа таъин ва аз вазифа озод карда мешавад. Шумораи ниҳоии кормандони дастгоҳи Хадамоти иҷозатномадиҳӣ 30 воҳид муқаррар гардидааст. Хадамот шахси ҳуқуқӣ буда, дорои мӯҳр бо тасвири Нишони давлатии Ҷумҳурии Тоҷикистон бо номи худ бо забони давлатӣ мӯҳрҳо, штампҳо ва бланкҳои дахлдор буда, аз ҳисоби ягона дар Хазинадории маркази Вазорати молияи ҶТ маблағгузорӣ карда мешавад. Имрӯз Хадамотро Файзуллозода Нусратулло Қудратулло, ки бо Қарори Ҳукумати Ҷумҳурии Тоҷикистон ба вазифаи сардор таъин гардидааст, роҳбарӣ менамояд.

Иҷозатнома (литсензия) ба довталабон мутобиқи талаботи Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» ва Низомнома «Дар бораи хусусиятҳои иҷозатномадиҳӣ ба баъзе намудҳои фаъолият» дода мешавад. Иҷозатнома – иҷозати махсусе мебошад, ки барои амалӣ намудани фаъолияти мушаххас онро Хадамот ба шахси ҳуқуқӣ ва соҳибкори инфиродӣ додааст.

Бе иҷозатнома машғул шудан ба фаъолияти сохтмонӣ ва меъморӣ, ки бояд барои иҷрои он иҷозатнома гирифта шавад, манъ аст. Дар Хадамот барои довталабони иҷозатнома тартиби ягонаи ҳуҷҷатгузорӣ муқаррар карда шудааст, ҳуҷҷатҳои довталаб аз тарафи мутахассисони Хадамот санҷида шуда, барои баррасӣ ба комиссияи иҷозатномадиҳӣ пешниҳод карда мешаванд. Комиссия дар навбати худ ҳуҷҷатҳоро омӯхта, вобаста ба имкониятҳои доштаи довталаб, қарор дар бораи додан ё надодани иҷозатномаро қабул менамояд.

Хадамоти иҷозатномадиҳии фаъолияти шаҳрсозӣ

Номгӯи намудҳои фаьолияте, ки аз тарафи Хадамоти иҷозатномадиҳии Кумитаи меъморӣ ва сохтмони назди Ҳукумати ҶТ иҷозатнома дода мешавад, инҳо мебошанд:

– фаъолият оид ба корҳои лоиҳакашӣ ва тадқиқотӣ, сохтмони биноҳо ва иморату иншоот, аз ҷумла васеъкунӣ, азнавсозӣ, таъмир ва барқарор кардани объектҳои мавҷуда;

– фаъолият оид ба васл, танзим ва таъмири иншоотҳо ва таҷҳизоти энергетикӣ (ба истиснои ҳолатҳое, ки ин фаъолият барои таъмини эҳтиёҷоти худи шахси ҳуқуқӣ ё соҳибкори инфиродӣ анҷом дода шавад);

– корҳои геодезие, ки ба сохтмон алоқаманд мебошанд.

Дар Хадамот бо мақсади дастгирӣ намудани рушди соҳибкорӣ ва фазои сармоягузорӣ дар Ҷумҳурии Тоҷикистон, барои гирифтани иҷозатнома тартиби соддаи ҳуҷҷатгузорӣ ба роҳ монда шудааст.

Мӯҳлати амали иҷозатнома барои фаъолияти сохтмонӣ ва меъморӣ на камтар аз 5 сол муқаррар карда шудааст. То моҳи сентябри соли 2005 ба ташкилоту корхонаҳо иҷозатнома ба мӯҳлати як сол дода мешуд. Мӯҳлати амали иҷозатномаро пеш аз ба охир расиданаш мувофиқи аризаи иҷозатномадор ба ҳамин мӯҳлат дароз кардан мумкин аст. Мӯҳлати амали иҷозатнома бо тартиби аз нав ба расмият даровардани иҷозатнома дароз карда мешавад.

Қобили зикр аст, ки баъди ба даст овардани истиқлолият ва ба охир расидани ҷанги шаҳрвандӣ дар ҷумҳурӣ бори нахуст бо Қарори Ҳукумати Ҷумҳурии Тоҷикистон аз 6 майи соли 1997, №211 Маркази давлатии литсензионии Кумита оид ба корҳои меъморӣ ва сохтмонии назди Ҳукумати Ҷумҳурии Тоҷикистон таъсис дода шуд.

Маркази давлатии литсензионии Кумита оид ба корҳои меъморӣ ва сохтмонии назди Ҳукумати Ҷумҳурии Тоҷикистон, тибқи Низомномаи тасдиқнамудаи Ҳукумати Ҷумҳурии Тоҷикистон, ҳамчун корхонаи худмаблағгузор то моҳи сентябри соли 2005-ум фаъолият намудааст ва Маркази мазкур дар миқёси ҷумҳурӣ Маркази аввалин ва ягонаи литсензиядиҳӣ ба ҳисоб мерафт. Дар вазифаи директори аввалини Марказ – Ибронов Мадихӯҷа Азимович таъин гардида, то соли 2000-ум фаъолият намудааст. Соли 2003 бо Қарори Ҳукумати Ҷумҳурии Тоҷикистон Кумитаи оид ба корҳои меъморӣ ва сохтмонии назди Ҳукумати Ҷумҳурии Тоҷикистон ба Кумитаи давлатии сохтмон ва меъморӣ табдил дода шуд. Дар ин давра раванди иҷозатномадиҳӣ тамоми соҳаи сохтмон ва истеҳсоли масолеҳи сохтмониро дар ҷумҳурӣ фаро гирифта, фаъолияти ҳама ташкилоту корхонаҳоро ба як низоми муайян даровард. Бо мақсади такмил додани раванди иҷозатномадиҳӣ дар миқёси ҷумҳурӣ, 17 майи соли 2004, №37 Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» таҳия ва қабул гардид.

Баъд аз қабул гардидани Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият», бо Қарори Ҳукумати Ҷумҳурии Тоҷикистон аз 1 сентябри соли 2005, №337 Низомнома «Дар бораи хусусиятҳои иҷозатномадиҳӣ ба баъзе намудҳои фаъолият» тасдиқ карда шуд ва баъдан ҳамин Низомнома бо Қарори Ҳукумати Ҷумҳурии Тоҷикистон аз 3 апрели соли 2007, №178 дар таҳрири нав қабул ва тасдиқ гардидааст. Бо Қарори Ҳукумати Ҷумҳурии Тоҷикистон аз 31 январи соли 2006, №72 Маркази давлатии иҷозатномадиҳии Кумитаи давлатии сохтмон ва меъмории Ҷумҳурии Тоҷикистон таъсис дода шудааст, ки то моҳи апрели соли 2007 фаъолият кардааст. Ҷиҳати иҷрои Фармони Президенти Ҷумҳурии Тоҷикистон аз 30 ноябри соли 2006, №9 «Дар бораи такмили сохтори мақомоти марказии ҳокимияти иҷроияи Ҷумҳурии Тоҷикистон», Хадамоти иҷозатномадиҳии фаъолияти сохтмонӣ ва меъмории Агентии сохтмон ва меъмории назди Ҳукумати Ҷумҳурии Тоҷикистон бо Қарори Ҳукумати Ҷумҳурии Тоҷикистон аз 3 апрели соли 2007 таъсис дода шуд ва то ба имрӯз фаъолият намуда истодааст.

Шумораи умумии мутахассисону коргарони Хадамот 29 нафар буда, 22 нафарашон хизматчиёни давлатӣ мебошанд, ки дар байни онҳо мутахассисони собиқадору соҳибтаҷриба фаъолият намуда истодаанд. Аз ҷумлаи мутахассисони собиқадори Хадамот – Мирзоева Давлатой Тағоевна, мутахассиси шӯъбаи омӯзиш ва назорат, Собиров Ҷӯрақул Маҷидович – сармутахассиси шӯъбаи омӯзиш ва назорат, Каримова Сайлигул Собировна – сардори шӯъбаи қабули ҳуҷҷатҳо ва чанде дигарон мебошанд. Мутахассисони Хадамот бо мақсади дастгирӣ ва пешбурди сиёсати Ҳукумати Ҷумҳурии Тоҷикистон дар соҳаи сохтмон ва Назорати риояи қонуният дар сохтмонҳои ҷумҳурӣ саҳми арзандаи худро мегузоранд.

Аз ин ҷост, ки мутахассисони Хадамот дар бунёду сохтмони иншооти ҷашнӣ бахшида ба 2700-солагии шаҳри Кӯлоб, иншооти ҷашнӣ бахшида ба 15-солагии истиқлолияти Ҷумҳурии Тоҷикистон, иншооти ҷашнӣ бахшида ба 20-солагии истиқлолияти ҷумҳурӣ ва дигар иншоот фаъолона иштирок намуда, саҳмгузорӣ намудаанд.

Дар давраи солҳои 2006 то семоҳаи аввали соли 2011 аз тарафи Хадамот ба 2510 шахсони воқеӣ ва ҳуқуқӣ иҷозатнома дода шудааст.

Қайд кардан зарур аст, ки дар солҳои 2007-2008 Лоиҳаи Агентии америкоӣ (ЮСАИД) таҳлили санадҳои меъёрии ҳуқуқиро дар соҳаи сохтмон ба анҷом расонида, ба ташкилотҳои системаи Кумитаи меъморӣ ва сохтмони назди Ҳукумати Ҷумҳурии Тоҷикистон, таҳлили мухолифатҳои дар санадҳои меъёрии ҳуқуқӣ ҷой доштаро пешниҳод намуд.

Қобили зикр аст, ки қонунгузории Ҷумҳурии Тоҷикистон дар соҳаи сохтмон омӯхта шуда, як қатор мухолифатҳои меъёрӣ ошкор карда шуданд. Дар таҳлили зикршуда тавсияҳо оид ба беҳтар кардани санадҳои меъёрии ҳуқуқии соҳаи сохтмон оварда шудааст, ки қабули онҳо метавонад ба ҷалби бештари сармояи дохиливу хориҷӣ ва рушди иқтисодиёти кишвар заминаи хуб гузорад. Дар таҳлили Лоиҳаи ЮСАИД мухолифатҳои дар санадҳои меъёрии ҳуқуқии Хадамоти иҷозатномадиҳӣ ҷойдошта, таъкид гардидааст. Аз ин лиҳоз, Хадамоти иҷозатномадиҳӣ барои бартараф намудани ин мухолифатҳо, ки аз таҳлили Лоиҳаи ЮСАИД бармеояд як қатор корҳоро ба анҷом расонид. Аз ин ҷост, ки бо фармоиши директори Кумитаи меъморӣ ва сохтмони назди Ҳукумати Ҷумҳурии Тоҷикистон аз 1 сентябри соли 2008 таҳти №59/ОП Низомномаи «Шӯъбаи омӯзиш ва назорат», ки дар Вазорати адлияи Ҷумҳурии Тоҷикистон ба қайд гирифта шуда буд, аз эътибор соқит дониста шуд. Дар навбати худ бо ҳамин Қарор «Қоидаҳои гузаронидани санҷиши фаъолияти субъектҳои хоҷагидор аз ҷониби Хадамоти иҷозатномадиҳӣ оид ба риояи шарту талаботҳои иҷозатномадиҳӣ» тасдиқ гардида, дар Вазорати адлияи ҶТ 15 сентябри соли 2008, №447 аз нав ба қайд гирифта шуд.

Қайд кардан бо маврид аст, ки кормандони Хадамоти иҷозатномадиҳӣ дар иҷрои корҳои ҷамъиятӣ фаъолона иштирок менамоянд. Кормандони Хадамоти иҷозатномадиҳӣ баҳри дастгирии сиёсати Ҳукумати Ҷумҳурии Тоҷикистон ва иҷрои дастуру супоришҳои Раиси Кумитаи меъморӣ ва сохтмони назди Ҳукумати Ҷумҳурии Тоҷикистон, дар гузаронидани маъракаву чорабиниҳо ва ҳашарҳои умумихалқӣ фаъолона иштирок намуда, барои тоза ва озода гардонидани кӯчаву хиёбонҳои пойтахт ва гирду атрофи корхона ҳиссагузорӣ мекунанд. Аз ин ҷост, ки дар Хадамот ҳар рӯзи аввали ҳафта бо аҳли коллектив барномаҳои сиёсӣ гузаронида шуда, аз тозатарин хабарҳои ҳаёти ҷумҳуриямон бохабар карда мешаванд ва имрӯз Хадамот, дар соли 2011-ум, ба рӯзномаҳои «Минбари халқ», «Мароми Пойтахт», «Ҷумҳурият», «Рӯзномаи бинокорон», «Народная газета», «Халқ овози» ва маҷаллаи «Бонувони Тоҷикистон» обуна шудааст.

Дар Хадамот барои гирифтани иҷозатномаи давлатӣ ба довталабони иҷозатнома фазои ягонаи иҷозатномадиҳӣ, ошкорбаёнӣ ва риояи қонуният дар иҷозатномадиҳӣ муқаррар гардидааст. Ҷаласаҳои комиссияи иҷозатномадиҳӣ озодона ва шаффоф, бо иштироки довталабон гузаронида мешаванд.

[b][center][attachment=8:

Назарсанҷи

Оё тартиби кори комиссияи Хадамоти иҷозатномадиҳӣ ба шумо писанд аст?

 

Суроға:

734025, ш. Душанбе, кўчаи проф. Ш. Ҳусейнзода 36,

Тел: +992 (37) 221-88-53
+992 (37) 221-88-33

Факс: +992 (37) 223-02-00,

Е-mail: goskomstroy@mail.ru

Обу ҳаво